[[Paul Rusesabagina]] yew [[Hutu]] yo, mudirê otela Hôtel des Mille Collines o. Cênika ey [[yew [[Tutsi]] ya. Wexto ke tertele dest pê keno, Paul her çira veri wazeno ke keyeyê xo raxelesno, labelê wicdanê ey rehet nêkeno u badêna destê ey ra çıqas ke ame, eke imkan beno wazeno ke dormeyê xo de Tutsi u Hutu'yanê multeciyan ki raxelesno. Raver, mulxıt u domananê keyeyê xo u cirananê xo beno otele. Badêna xeylê Tutsi u Hutuyê ke cengi ver ra remenê, inan ki gêno otela xo. Otele bena zey kampê multeciyan. Heto bin ra idarekaranê dewlete de u tayê merdumanê muhiman de tekildariya Pauli esta. Paul na tekildariye çarneno fırsend u xeyrê na tekildariye ra, heyatê 1300 insanan sevekneno u peyniye de heyatê inan raxelesneno. Peyniya filmi de, multeciyê ke otela Pauli derê, cênik u domanê Pauli u be xo pêro piya remenê hetê isyankaranê [[Tutsi]]yan, uca de yew kamp de manenê, çımki uca hetê asayişi tayêna rınd o u tehluke tayêna şenık o. Peyniye de, nê multeci u keyeyê Pauli vêrenê ra hetê Tanzanya u heyatê xo raxelesnenê. Dıma film qediyeno.
Film de teyna na hikayeya corêne nê, Terteleyê Rwanda sero zewbina xeylê detayê bini ki yenê verê çıman. Mesela, wexto ke no tertele biyo dewletanê rocawani tertele seyr kerdo u qet mudaxale nêkerdo. Mılletê Yewbiyayey u eskerê dewletanê rocawani, terteleyi rê qet mudaxale nêkenê. Heto bin ra gûya dewletê Rocawan u [[Ewropa]] eskeran rusnenê [[Rwanda]], la nê eskeri tenya merdumanê sıpiyan u hemwelatıcanê xo seveknenê u Rwanda ra taxliye kenê, peyniye de eskerê Rocawani be xo anciyenê u tertele dewam keno. Ancina, Fransa peşti dana hukmatê Rwanda yê goniweri, u terteleyi de het gêna pê (tepışena).
