Duzgın

Duzgın ya ki Duzgın Baba (Duzgın Bava) ya ki Duzgınê Kemeri Dêsım de, Elewiyanê Zazayan pêrıne çım de u Kırdasan u Tırkmenan u Ermeniyanê Dêsımi rê ki pilê ziyarano. Caê xo Qısle ra hetê veroci dero, qeza ra 12 km dûrio. Duzgın be xo vanê lacê Şa Heyderi biyo. Şa Heyder lacê Kureyşi (Khurêş) biyo.

Caê ziyare

Caê ziyare serê kemeri sero. Nê kemeri rê Kemero Bımbarek, Kemerê Duzgıni vanê. Caê ziyare Zargovıto, dewa Qıli ra nezdiyo.

Şanıka Duzgıni

Duzgın lacê Şa Heyderê Kureyşio (Sa Heyderê Khurêşi). Wertey zımıstani de ke malê xo beno çırayneno, ano, niya danê (ewnenê) ke malê xo qelewo, tawliyo. Şar şaş u waş kewno cı, na zımıstan çıtewr beno ke mal hende tawli beno. Rocê piyê xo dızdiya ey (miyanki) kewno a ey dıme. Duzgın ke malê xo beno, çırayneno, dest de uşira xo ra dano erd ro, her ca beno kırr-kewo, weşiye bena têra, mal ki tey çereno. Mal ke piyê Duzgıni vêneno, ceneqiyeno we, terseno, a helme de Duzgın ki vano, "Se bi, şıma Kureyşo Kurr di ke tersenê?". Eke xo çarneno a cı, vêneno ke piyê xoyo hao uca, şermayiyeno. Ar keno ke namey piyê xo dardo we, cı ra "Kureyşo Kurr" (Khurêso Khurr, Gosekhurr) vato. Şermanê xo ra remeno, be hirê gami reseno Koê Duzgıni, beno sırr.

Tayine çım de Duzgıni "Khurêso Khurr" nêvato, heqaret vênenê. Taê versiyonê na şanıke estê.

Kılaman u veng'a Heqi daene de Duzgın

Xeylê kılamanê verênan u nıkaênan de u wexto ke cemê heqiye de veng'a Heqi danê, qalê Duzgıni zehf vêreno.

Waê Duzgıni

Vatene ra hirê waê Duzgıni benê: Jêle (Zêle), Xaskare, jû ki Buyere. Nê namey koyanê.