Mehemedê Hezanî

Mela Mehemedê Hezanî (b. 1938, Hezan) yew zanayeyê dînî û nuştoxêko kird o.

Mehemedê Hezanî
Melumato şexsi

Cuya ey

Serra 1938 de nehîyeya Licê Hezan de ame dinya. Pîyê ey Mela Ebdulxefûr melayê Hezanî bi. Ey verê pîyê xo de dest bi wendişê erebkî kerd. Wexto ke serra 1949 de Hezan de reya verêne mekteb virazîya, ey zî eynî serre dest bi wendişê tirkî kerd. Badê ke panc serrê wendegehê verênî temam kerdî, na rey teberê Hezanî de dest bi wendişê medresa kerd. Ewilî Dîyarbekir de medreseya camîyê Hezretî Umerî de verê Mela Evdisemedî de wend. Dima Licê de Mela Evdilayî het wend. Dima, medreseyê dewanê sey Balicne, Metranî û Kemberlî de wendişê xo dewam kerd. Qederêk zî Bismil û Mêrdîn de wend. Peynî de dewa Dîyarbekirî Baroxlî de wendişê xo temam kerd û serra 1969 de ey dewa xo Hezan de dest bi melayîya resmî kerde. 1992 de wezîfeyê melayîye ra teqawut bi. Wezîfeyê xo yê melayîye seranser dewa xo Hezan de kerde.

Mela Mehemedê Hezanî serra 1969 de dest bi nuştişê şiîranê kurdkî kerd. Ey reya verêne kitabê xo Mecnûn û Leyla bi kurmanckî (kirdaskî) nuşt. Kitabê ey Eqîdetul Îmanî, verî bi kurmanckî serra 1980 de nuşt, dima bi kirdkî (zazakî) serra 1981 de nuşt û ey bi xo nê her hîrê kitabê xo metbea de çap kerdî. Ey nê kitabê xo bi alfabeya erebkî nuştê.

Kitabê ey

Eserê ey ke çap bîyê nê yê:

1. Mecnûn û Leyla (kurmanckî), Dîyarbekir, 1979, 54 r.
2. Eqîdetul Îmanî (kurmanckî), Dîyarbekir, 1980, 27 r.
3. Eqîdetul Îmanî (zazakî), Dîyarbekir, 1981, 30 r.
4. Tefsîrê Roşnayî (zazakî), 2 cildî, Dîyarbekir, 2016, 1104 r.

Çimeyî

• Mela Mehemedê Hezanî (Bîyografî), Zazakî.NET