Pırdê Çinvati
Pırdê Çinvati, pırdê çinavati, pırdê çinvari[1] (Ewıstki: Cinvatô Peretûm) yew pırdo ke cihanê ganiyan u cihanê merdeyan yewbinan ra cıra keno,abırrneno. Gorey Ewısta ra gereke ke heme rohan merdış ra dıme enê pırdi ra şıro. Asayışê pırdi çinvato, gorey aşa u durıstiya merdumi ra vuriyeno. Nuştey bundaxışini de nuseno ke eke merdum gunakaro u guna kerdo, pırd cı rê zaf tenik u zor aseno u yew estiya (mexlukat) ke namê cı Vizareşo, vera merdumi ra veciyeno.[2] Rohê enê merdumi kewno druc-demana (banê zurkerdoğan). Druc demana yew cayo ke tede dec esto u merdum decneno, cı rê vaciyeno.[3] Hema eke merdumo ke hewlo u karê xaseki kerdo, melego ke wehy ano, vera cı ra veciyeno u merdum deyr u kılaman piya şıno Bonê Kılaman. Rohê ke pırd ra hewl vêrenê ra, ê be Ahura Mazda ra yenê têlewe. Zerduştiye de hirê Homayi Pırdê Çinvati pawenê u sıtar kenê: Sraoşa (İtaat), Mithra (ad/aqid/ahd) u Raşnu (edalet).[4] İslam de pırdê Sırati zey Pırdê Çinvati aseno u ey ra zaf nezdiyo.