Sempozyumê Zazaki Viyena de

“Akademiya Zonê Zazaki - Austriya“, 18ê Gağani 2015ine de, paytextê Austriya Viyana de jü sempozyum ard meydan. Na komele nê kari ra raver wertê jü serre de 10 amori perloda (pêseroka) “Raa Ma“ veti bi. Sempozyum de çar zoni amey qesey kerdene: Zazaki, İngilızki, Almanki u Tirki. Sebeta nê sempozyumi, ê zonzonağê ke sılaiye kerdi bi, inu ra teyna dı teni nêamey bi.

Afişê Sempozyumê Zazaki Viyena de

Seate 18.00 de rae dê nê sempozyumi. Sermiyanonê “Akademiya Zonê Zazaki - Austriya“ ra Ali Dikmey ebe zonê Zazaki meymani sılam kerdi. Dikmey, hata nıka Viyana de sebeta zonê Zazaki kami çı kar kerdo, pêro ardi zon ver. Sermiyanonê komele ra MMag. Dr. Zeynep Arslane, qesey kerdena Dikmey çarnê zonanê İngilızki u Almanki.

Prof. Dr. Heiner Eichneri, no zon çutır xeleşino ra, ney sero ma rê çığıri day pıro. No zon koti ra amo, o ard zon ver. Mesut Keskin, zonê Zazaki çutır standardê xo vineno, ey sero vındet. Prof. Dr. Jaffer Sheyholislami, xeta “Skype” sera bi meyman. Kurdıstanê İraqi de Sorani u Bahdini (Kırdaski) çı hal derê, qal ard cı. Zonê ke bınê pınga zonanê binu derê, ine ser qesey kerd, Dr. Zeynep Arslane çarna Almanki. Prof. Dr. Ursula Hemeteke cüabê nê persi da: Zonu rê çı kifayetê lawıku, kılamu, qeydu esto? Prof. Dr. Katharina Briziçe, ê isonê ke waxtê mektebi ke amê, zonanê xo ra benê düri, zonanê binu musenê, peyniye de zonê xo kenê xo vira, na khul sero vındete.

Nê senpozyumi de êrğatkerdoğa vırêne Dr. Zeynep Arslane biye. Ae qesê xuyo peyên vat, sempozyum xeleşiya. Şêrange zerre de beli bi ke rınd sono. Mıletê bilanu ra jêde, xort u azebi biy.

Çıme: Ali Dikme