Vaten:Zend pigar/Milçık

MİLÇIK (SONIK)

Ceyk ben ceyk nıben. Yow milçık bena fır dona, şena. Yow telı kena xuı feka ona sêr’ luacınê yow boniya nona rûı. Yow cinek uja mir xûı alewına o şına pıxêri dı adır tevıstına kena we. Toqê non erzena kuıcalon ser. Teromê adır ser’ gûıdon mir diyar xonçiya kena a, pojına. Ḥend vinına luacın ra telı amı war. Cınek telı gına kena bın terom ra o non xûı pojına. Non potış qıdıyen milçık yena vêr’ cınek. Milçık vona: Xalê dı nonon bıd mı? Cınek vona: liya uja ra weta şue ez qey non xuı bıd tûı? Milçık vuna: La qey tûı pê telê mı non xuı pot. Cınek vuna: Liya telı luecın ra gına ‘erd mı zı guret kerd adır’ bın ra. Hay emon çey yow telı vera dı non diyên’? Milçık vuna: Telê mı bıd niyoz dı nonon bıd tûı nıda ez şena cey qadiya. Cınek ına pêsir bı gıroni ver gena dı nonon dona cı. Milçık non xuı gena, fır dona xêylek ca perena, yena cey yow merikiya. Milçık vona: Bırawo biye ma non burır. Myerık ho cey tey bızona. Myerık bızon ra şıt dueşen’ o yen’ cey milçıka. Myerık von: Wayê biye ma piya burır. Milçık vona: Mı newı pey ıni kerron ıd werd. Myerık non pê şıta wen pizê xuı ken mırd. Milçık vona xalo dı bızon bıd mı vera non mı da tuı. Myerık: Non tûı da mı. Çey dı non vera dı bızon diyên’. Milçık honc vona ez şena gerrê tuı kena. Myerık terson xuı ver dı bızon donı milçık. Milçık bızon xuı şonena xuı ver şena. Yena resena yow cıtyeri. Cıtyer pê dı gayona ho cıt ken. Milçık bızon sarre bırnena gueşt erzena adır ser. Milçık vona: Xalo biye ma gueşt b’wer’. Myerık qefıliyawı o bu vêyşon. Myerık yen gueşt wenu bacê milçık honc vona, vera bızon gayon xûı bıd. Myerık von: Hay emon çey vera dı bızon dı gay diyên. Milçık vona: Ez gerrê tuı kena. Merık gayon donı milçık. Milçık gayon xuı gena, dona ra. Tey ca şena yena yow dow. Dowı d’ vêyve na piyera. Şena kiyê vêyvi, gayon milçık kena guemı. Milçık bena mêymon kiye vêyvi. Şow piyeru kuen ra, sêr’ sıbay ro ra kard gena, şena guemı wurd gayon sare bırnena o karda gûinin miyon kıncon vêyva newi dı nımnına. Sıba diyen milçık vona: gayon mı biyarên, ez şena. Kiyê vêyvi şini guemı la gay wurdi zi sare bırnayê. Milçık vona: Kom gay mı sare bırnayi, ez vera yı gena. Milçık her ca gêyrena karda gûinin miyon kıncon vêyv dı vinena. Milçık vona: Ez vera gayon vêyva newi gena. Kiyê vêyvi: Liya çey ona bu. Ma gay tuı sare nıbırnayi. Milçık: Ez gerrê şıma kena. Vêyva newi donı milçık towr vêyva kuêni rıyer şin. Zaf ra teyn şin resêni yow şownı. Milçık vona: Şownıwo nıben, ez ına vêyv bıd tuı. Tuı zı eya zelê xuı bıd mı? Şownı qebul ken. Milçık zelê xuı gena, şena sêr’ yow kerri. Zel cenına bınê vona: dutu. Mı yow telı da dı non gurêt’, dı non dey dı bız gurêt’, dı bız dey dı gay gurêti, dı gay dey yow vêyv guret, yow vêyv da yow zel guret. Milçık zel finena kerona şıknena fır dona, bına vin azminon ra. MI RA ZUR HUMAY RA RAŞT, MI YOW TYEŞT ḤELAW VIRAŞT PÊ ŞIMA KERD RAŞT!