Zazakipediya:Şanıke

Tore tore sanıki estê. Taê sanıku de i(n)san esto, taine de ki heywani, theyr u turi tederê.

Sanıkê i(n)sanu, meselê ke amê vêrdê ra, ine ra pêda biyê amê. Sanıkunê nianenu de leto jêde, mılet çıturi verva dısmenê teveri lez keno, tey ceng keno, o yeno ra zon. Hadiseê nianeni amê,vêrdê ra, zamanê ra tepiya biyê sanıki mendê. Na sanıku de çêreni u cüamordiye, cênieni u cüanıkiye, haskerdena cêniu, haskerdena laji ve ma u pi ra, haskerdene hurdemena bırau, haskerdena welat u mıleti wes vajina, i(n)san sero zaf teşir kena, tede kar kena. Jü hetê sanıke niaro. Heto bin de ki dısmeno zalım u zulımkar ve xainu ra vininê. Sanıka Şêvdin Begi, yê Dewrês Begi, yê Kulıki nianenu ra say benê.

Xêlê sanıkê heneni ki estê ke, tede dêv ve i(n)sani ra vejinê. İ(n)san, heto rınd, dêv ki heto xıravın temşil keno. Sanıkunê heywanu de, bıze, verg, hes, lüye ve kerzık u qırnıki ra yenê meydan.

Sanıkunê i(n)sani ra taê ki i(n)sani finê huyais, eve u tore gosedaru xezelnenê. Nianenu ra sanıkê Keçeleki zaf wesê. Keçelek sanıke de daima heto heq, heto raşt temşil keno. O, hêfê ho hetê neq u xıravıni ra eve camvajêni u anajêni, eve fêndi, eve xapnais cêno, kuno ra ser. Hetê neqi fino halo henê ke, gosedari zaf pê huynê, ero cı wes yeno, benê sa.

Sanıki, leto jêde seveta terviakerdena domanu zaf muyımê. Ronişten u rauştena domanu eve vasıta sanıku asıl bena. Sanıki, raşti u ğeletiye sero, rınd u qolae sero, bomeni u baqıleni sero hem ki haskerden u zerrevêsaeni sero derse danê i(n)sani.

Nuştoğ: Zılfi Selcan