Cıns (neri/may)

Gramerê zıwanê ma Zazaki de çekuyê nameyan hetê cınsiyeti ra yewbini ra abırriyenê. Yew (jü) name ya nerikio ya ki maykio.

No abırnayışê cınsiyeti taê zıwananê binan de, zey Fransızki, İspanyolki, İtalyanki uêb. de ki esto.

Nameo neriki

Gramerê zıwani de çekuya ke hetê cınsiyeti ra neria, cı rê nameo neriki vaciyeno.

Zazaki de çekuyê nameyanê nerikiyan be nê peybendan qediyenê:

be herfa bêvenge

Çekuyê nameyanê ke be herfa bêvenge qediyenê, pêro nerikiyê.

• Nımuney: ap, İran, lac, khalık, lacek, verg,

be -a

Taê çekuyê nameyanê ke be -a qediyenê, nerikiyê.

• Nımuney: bıra, bıraza, va, zama

be -e

Taê çekuyê nameyanê ke be -e qediyenê, nerikiyê.

• Nımuney: este (aste), keye (çê), mêrde, name, sere (sare),

be -ê

Çekuyê nameyanê ke be -ê qediyenê, pêro nerikiyê.

• Nımuney: arê, çê (keye), lê

be -i

Taê çekuyê nameyanê ke be -i qediyenê, nerikiyê.

• Nımuney: koli, pi

be -o

Çekuyê nameyanê ke be -o qediyenê, pêro nerikiyê.

• Nımuney: do, ko

be -u/(-ü)

Çekuyê nameyanê ke be -u (ya ki -ü) qediyenê, pêro nerikiyê.

• Nımuney: du (dü)

Nameo mayki

Gramerê zıwani de çekuya ke hetê cınsiyeti ra maya, cı rê nameo mayki vaciyeno.

Zazaki de çekuyê nameyanê maykiyan be nê peybendan qediyenê:

be -a

Taê çekuyê nameyanê ke be -a qediyenê, maykiyê.

• Nımuney: çıla, dınya (dina), keyna (çêna), Tırkiya

be -e

Taê çekuyê nameyanê ke be -e qediyenê, maykiyê.

• Nımuney: cênıke, dare, keyneke (çêneke), lınge, mae, serre, weşiye
• Peybend -e taê fekanê Zazaki de biyo -ı, tainan de ki dariyo we, yanê biyo vin(d)i.

be -i

Taê çekuyê nameyanê ke be -i qediyenê, maykiyê.

• Nımuney: kardi, pheşti, tici