Enis Amri

Enis El-'Amri (Erebki أنيس العامري, DMG Anīs al-ʿĀmirī; b. 22. Gağand 1992 Tataouine, Tunıs m. 23. Gağand 2016 Sesto San Giovanni, İtalya de) teroristê do İslamciyo ğezebtulao ke çend rey hıkum werdeo Tunısıc bi.

Ey Bacarê Berlini’ê Noeli de roca 19.12.2016ıne de pê TIR ramıt insanan ser, 12 teni kışti, sûka İtalya Milano de hetê polisan ra yew kontrolo rutin de kışiya. Heqa Enis Amri de Ewropa de emrê cıgeyrayışi veti bi.

Wexto ke polisê İtalyani şewa 23.12.2016 ra saete 3yıne de erebey kontrol keno, ey ra ki kağıtan pers keno, Amri xafılde dabançey xo anceno, adır nano polisê ra, erme ra keno dırbetın (bırindar). Nae sera ki poliso bini nano Enis Amri ra, ey kışeno. Saeta ke nano pıra, merredneno erd ra (dergê erdi keno), polisi pê tenefuso suni kenê ke ey weş kerê. Rêça engıştanê (bêçıkanê) cı ra tesbit biyo ke mordemo kışiyae Enis Amriyo. Vanê, oyo Fransa sera be tırene ameo İtalya. Poliso ke erme ra biyo dırbetın (darbıcêyın), tehlıkeo heyati de niyo.

Sawciyê Almanya’ê Pêrıne 23.12.2016 saete 13:30 de (saeta Ewropa miyanêne) beyanê dewesi (çapiye) de ard a zıwan ke êyê merdena Amri ra dıme ki na dewa teqib kerê, rêçan bıramê; beno ke torrê nê şebekey terori bıbo, êyê kewnê a peştdaoğan dıme.

Se bi bi? 19ê Gağandi (Zımıstania Verêne), Berlin de, bacarê Noeli de Amri pê yew TIR  ramıti bi qefley insanan u holıkan ser, 12 teni kışti. Ey ra aver ki Amri o TIRê Polonya remnao, şoferê TIRi ki pê dabançe nao pıra, kışto.

Polisê Almani sıfte yew multeciyo Pakıstanıc tepışti bi, eke veciya werte ke o niyo, anci verdao ra. Tepeya kabinê TIRi de kağıt u rêçê (şopê) engıştanê Enis Amri ameyê diyene.

Senên Almanya de mendo? Enis Amri Tunıs ra multeci ameo Almanya. Muracatê ey’ê iltıca red biyo. Lista dewlete de İslamisto tehlıkeyın tayin biyo, labelê anci ki peyser nêrışto, Almanya de mendo.

Amnanê 2015ıne Amri İtalya ra multeci ameo Almanya, muracat de ey xo Mısırıco siyasiyo teqibbiyae dao şınasnaene (nas kerdene). Hıni aseno ke ey Ewropa de be taê kamiyan (huwiyetan) lewiyao. Temuzê 2016ıne de o gırewto hepısê teberê sindori kerdene. Oyo ke kağıtê ey Tunıs ra kemi biyê u dairanê dewleta Tunısi  ki o hemwelat (vatandaş) qebul nêkerdo, dairanê Almanya nêşao o peyser bırışo (bıerşawo). Dairan zanao ke Amri hem İtalya de hepıs de mendo u Almanya de ki dosyay ey’a sucan perç u puf biya, bes nêbiyaena delilan ver nêşao zêde teba bıkero.

Nê weqati ra tepeya wezirê Almanya’ê karanê zerrey (içişleri bakanı) De Maizière qail bi qanunanê teber kerdene taêna zıxm (sıqi) kero.