Memo Bom
Memo Bom, Dêsım ra, dewa Pılemoriye Bardağçiye, eşireta Bêxan ra merdumê do namdaro parseci bi. Guman beno ke serra 1969ine de merdo; gorey tainan heta serranê 70 ki weş biyo. Leqema xo bom cıwabnextık u wahêrê cesareti biyaena xo ra gêno, çımke qet bınê qısey de nêmaneno. Leteo zêde cênıki kewnê ra cı ke ey bıqehrnê, labelê ê bini ki, ağa bo, xanedan bo, kam beno, bıbo, Memo Bom cıwabê inan resneno cı. Mıntıqa Pılermoriy u Erzıngani de qısê Memê Bomi zahf meşurê.
Esıl ser Memo Bom merdumê do feqir u mıhtacê parskerdene nêbiyo. Rocê ke şiyo hetê Têrcani, dewa Yastuğe, eke uca ra geyreno a, raştê heşê be khudiyê xo ra beno. A helme de heşe xo erzena Memê Bomi, kena ke ney parçe kero, no xo nano ro merdene. Eke reyna xo lewneno, heşe yena, ney gewexnena, anci şona. Şona, erd kınena ke ey çale kero. Deqawa ke remeno, wed keno, "ez ke na jile ra xeleşiyu, raa Heqi ke xorê pars kon". Eke xo heşe dest xelesneno, o wext ra tepeya sondê xo ano herune, sênerut be hera xo Pamuxe ra dewe be dewe feteliyeno (geyreno), pars keno.
Weqatê ey be heşe ser Memê Bomi na hewa veta ro cı:
Yastuğe vera sona lêyi
Zalıme amê ke khudiyê xuyê tey
Mı va; tersa mı çı ke na zalıme mı buro
Ceveliyê[1] mı pey de verdo sey
Hewarê xo de wazonu
Qılawızê Hemê Sey[2]
Yastuğe vera sona dırrıke
Zalıme amê, ez fiştu vırrıke[3]
Mı va, kafıri, to çı mı rê kerda rıke
Nişta ro mı ser, mı serde kena
Menda re qesavciyanê suke
Hewarê xo de wazonu
Qılawızê Hewsê Darevike[4]
Meni
bıvurneÇımey
bıvurne- ↑ Ceveli: namey lacê xoyo
- ↑ Nisangê Hemê Sey (ziyare) dewa Miyandonıke dero, Mazra Sılêmanu seroa.
- ↑ vırrıke fiştene: jüyê vızıke fiştene, dorme de çerexiyaene.
- ↑ Dewa Darevike destê Erzıngani dera, boverê dewa Gole de (Gole, Xêrkunet ya ki Yarbaşiye seroa), hetê Mıti (Pılemoriye) ra cor.
- Memo Bom meniyê de Sey Qaji de vêreno, yew ki kıtabê Xal Çelkeri Ebe yaraniye kewtime rae de taê meselê ey nuştê.