Zazakipediya:Xal ve werezay ra
Xal ve werezay ra
Rozê Wereza genım beno arêye ke rariyo. Xal ki arêye de beno, niadano ke Wereza hao dot ra qatır bar kerdo yeno arêye. Vano: - “Werezayê mı nao yeno, ardunê xo ra ma rê phovıku pozeno, xo rê weme.”
Wereza yeno, genımê xo rino ra, Xal vano: - “Wereza, de biya ardunê xo ra ma rê phovıku poze, ma pia burime.”
Wereza vano: - “Xalo, niade ardê to -Haq bo ke!- yê mı ra jêderê, eke ardunê to ra Phovıku pojime burime, se beno?”
Xal ve werezay ra xeyle ke kunê tê, têsare nêkenê, Xal vano: - “Nia nêbeno, bê ma jüru bıkerime. Kami ke jürê rındi yimıs kerdi, o phovıku ardunê yi bini ra pozeno, weme.”
Wereza vano “heya, tı hala sıfte ke!” Xal sıfte keno, vano: - “Mı fekê çhemi de qerpuji nay vi de, bıra mêratu hên guret vi, hên guret vi ke, tığe eşt vi boverê çhemi. Her ju qerpuze hondê na kemera arêyi gırse biye. Ma ju qerpuze kerde dı letey hên nêro qatıri, berde suke de rote.“
Dıma Wereza vano: - „Pê sekena!? Balığê de mı bi, pırrê mêsu bi. Mı sodırane çêver kerdêne ra, mêsê xo ju ve ju mordêne, hên kerdêne tever. Sondane ki mêşi ke amêne, mı oncia ju ve ju mordêne, hên kerdêne pêtage.
Rozê sonde mı niada ke, ju mêsa mı tey çina, nêama çê. Se bıkeri, se mekeri.. biyo tari. Hata muğurvê soni bekle kerde, ondêre nêamê. A sewe hata sodır hewnê mı nêame. Teseliya mı kote, xorê tenê niştu ro, mı tabağa xuya bafine vete, xo rê cığarê pişte têra, sımıte, hata ke zereqê tiji est lilıka mı. Goçênia xo gurete, vejine serê boni. Mı goçêni tikmisê hardi kerde, vejine ser, darê cığara xo guret, sana verê çımê xo, lonıke ra nat bota şêrkerd ke çı bıvêni... Dumanê kou mı nêcêro! Eke ke mêsa mı hawa cêr jüyê Paloyiji ververê gaê xode fişta cüyn, pê cüyn çarneno. Mı dikê xo ont tever, xıla phoşti da, hên fişt ve rem ke, jê astorê vaê vorti helmê de uza vêjine.
Mı va: - “ Nê lao tı ar nêkena, na mêsa mına sırmıze ververê gayê xo de fina cüyın?«
Paloyiji vake: - “Ma ezo seykur se keri, çutê gayê m' çinê ke ez coyın bıçarni!”
Mı va: - “Nafa to ef kon, reyna çiyo henên meke, yoxsa sasadır ra erzon to ser!”
Bine ve mêsa xo ro, gurete este terkiyê xo, niştune dikê xo, eve rem ameyme çê. Mêsa xo terki ra vete ke zerrê pêtage keri, niada ke çı bıvêni! Eke ke hamute sano vılê mêsa mı, vılê xo moso biyo khırr-khêwe. Tenê purê goze, eve tenê zirçê kergu ra sana pê, rınd têv da, kerd melem, na ro vılê mêsa xo, mêse thon dê, este zerrê pêtage. Dikê xo ki berd est tare ser, şine ke çê de helmê hewna şêri. Nêzo tenê paşine - nêşine; Heq zoneno, dikê mı veng da.
Sırtmısê serê xo bine ke, çı bıvêni! Eke ke vılê mêsa mı gureto de, sero dara goze rewiya, biya ve azgêliye. Dare hên goji gurêtê, hên goji guretê ke, eve helqostu ra goji guretê.
Ma sebıkeri, mejmur mendu, mı goze dıasê roji pite. Goji ke bi khakıl, vejune ser, mı sanay ro, amune war. Mı reyna gılê dare ra niada ke tek ju goze gılê dare ra menda. Destê xo est hard, Qılapê herre ame mı dest, guret kuya ve goze ra. Kaşkêna pa mekuyêne! Mêrato qılape şi gılê dare ra mend. Pa caverda, şine zerre.
Roza bine vejune tever ke çı bıvêni; qılapê herre serê dare de biyo gırs u hira. Niadanu ke roz ve roz beno jê yajiye. Mı merax kerd. Xeylê waxt ra têpia, ez o merax ra pıloşine dare ro, vêjine ser. Vejine ser ke, çı bıvêni; eke sero hegaê rewiyo, hao zerk dero. Gereke bıçini. Mı vaşturiya xo gurete, şine hêga. Ez xo xo de fıkırine ke; ni hêgay çıtur bıçini, na honde genım çıturi biyarine war!
Hên o ğem u dem de dormê hêgay de turê dê xo. Mı niada ke awrêsê wertê hêgay ra pırt bi, rema. Mı na ra dıme, a vaşturiya ke mı dest de biye, mı kuyê ve awrêşi ra, şiye kute ´ra qına awrêşi, awrês dormê hêgay de çerexiya, ame nat, şi dot. Haq raji bo, awrêşi xo dıma hêgaê mı çınıt, est uza.
Oncia xo xo de: »Ma ez na tığa genımi çıtur berine cêr!... «va u nat botê xo şêr kerd, thawa nêdi. Bado mêsa mı amê mı viri, filişkiye dê pıro, mêsa mı amê cor lewê mı. Mı polıke este ser, polan gırê da. Malağmê genımi naro cı, pê dae berd cêr, cüyın de est pêser. Çutê gayê xo ardi, cüyın çarna, genımê xo vet, kerd ve çüalu, sımer berd kerd mereka xo. Bado gınu puro ke, gayê de mıno ju çino. Nata şêr kerd, bota şêr kerd, caê nêdi. Gayê mı werte ra ang u phang bi şi.
Teseliya mı kote, mı genımê xo bar kerd, ard arêye. Eke ke çı bıvêni, owoo Xalê mıno delali ki amo, arêye dero. Ma pia genımê xo rid ra, ardê xo kerdi çüalu. Mı ardunê xo ra Xalê xo rê povıki mir kerdi, kerdi lozıne ke pojine. Niada ke, çı bıvêni; povıke zerrê adıri de, her ke şiye perpeşiye biye phılıke, biye ve gırs u peyniye de peqê. A deqa de gayê mıno ke cüyın de bıvi vindi, zerrê povıke ra xıl da, vejiya şi tever. Povıke xo rê perrê, adır xo rê perra, hevikê mend ke ma arêye sari ki bıvêşnime...“
Xali qesê werezay uza de bırna: - „Wiy! Oli adırê jürê to rê Wereza, ha... “va, gurêti ardunê xo ra werezayê xo rê povıki poti, mordemê ke uza, pêro pia povıkê xo werdi, çêfê xo de niada.
________________________________
- Sanıke: Dêrsım - Qısle (Nazmiya)
- Arêker: Hawar Tornêcengi