Zazakipediya:Dısmalı remnayenı

Mabêndê pê ra dısmalı remnayenı: Na kay hım qeçkan, hım xortan u hım zi resayan miyan dı kay bena. Wext beno qeç, xort u resayey heme piya têmıyan dı na kay kaykenê. Qandê kaykerdenda na kay qeç, xort u resayey cayê do veng dı, meydanê dı yenê pêser. verê destpeykerdenda kay dımerdıman xo rê pawıtox, idarekerdox, hekem weçinenê. Nê Hekemê kı ameyê weçinayenı, gorey seran, gorey remayenda ê şêlıgi inan kenê dı beri, dı gürıbi. Mesela ê kı serandê pê dı rê jew ravêreno gürıbê o bin zi ravêreno gürübda binı hemverdê ey. Bı no hesaba, dı wardê jewbiyayenı dı, wardê demokrasi dı zey pê ra bara kenê. Bı no şekla pê ra bara kerdi tepey a, bı gamana dergeya ê meydani peymenê. Mesela wexto kı dısey metro biro, werteyê ey vinenê u belli kenê. Yanê semetro (100 m) kıştê dı semetro kışta binı dı verdanê. Peyniya ê semetroy dı zi xetêda dergı ancenê u ê kı kenê kay kerê inan benê peydê a xetı dı pê kışta gorey serandê cı rêz kenê. Vanê kes a xetı nêravêrno, semetroy ra zere nêkewo u hetê kışta wertiya niro. Bı no şekla organize kerd tepey a, ê Hekeman ra jew dısmalê gêno xo dest u şıno wertedê ê dısey metri dı vındeno. Werte dı vınderd tepeya, serê a dısmalı keno xo dest u destê xo hewara tepşeno. O Hekem o bin zi ê kı dı serandê pêdı rê inan ra hergı kıştı ra jewi keno hadre. Kerdi hadre tepey a, ya heta hirını amoreno yan zi fitıkı cıneno. Wexto kı heta hirını amord yan zi fitıkı cınê tepeya, merdımê wırna kıştan hetê dısmala remenê. Eger jewi xo verê jewi resna dısmalı, o beno a dısmalı ro, dısmalı gêno u peyser remeno yeno cadê xo. Wexto kı o beno a dısmalı ro, dısmalı gêno u remeno, o bin zi pey ra kewno ey dımı kı, ey tepêşo. Wexto kı hewna herunda xo, cadê xo nêresto, nêresayo, o bin pey ra biro xo ey resno u destê xo pey ra ey ro do yan zi ey tepêşo, o kı tepêşiyayo o veşeno. Yanê o kı pey ra destê xo dano pırr o, o qezenc keno. Wexto kı nêşo pey ra destê xo pıro do yan zi ey tepêşo, no fın o bin qezenc keno, o kı pey ra nano dımı o vıni keno. O kı dısmalı gırota u remayo o serkewno.

Wext beno dı a remayena destpeykerdenı dı wırna piya xo resnenê cadê dısmalı. Dısmalı vero zey dikana pê vero şınê u yenê kı ay pê destan ra bıremnê u berê cadê xo resnê. Jew destê xo erzeno cı kı dısmalı bıremno, o bin destê xo erzeno ey kı ey tepêşo. Jew destê xo erzeno o bin vıradano, o bin erzeno o vıradano. O wazeno o bıremno kı o pey ra destê xo pıro do, o bin wazeno kı o bıremno o destê xo pıro do u ey bıveşno. Bı no hesab a pê xam kenê u zey dı dikana pê ver o vındenê, şınê yenê. Tabi o mabên dı inan ra jew do çımakerde vıjêno, ê bini keno xam u fınê ra beno dısmalı ro u remeno. Eger o bin zi çımakerde u şit bo, o fek dı hıma pey ra destê xo dano ey ro u ey veşneno. Ju ju fını bena o kı beno dısmalı ro u remeno, o ê bini ver reyêno, ju ju fını bena nêşeno xo cı ver bıreyno u veşeno.

Bı no hesab a cıt bı cıtı heme qedıyay tepey a, peyniya kay dı kamcin kıştı vêşi ameya, a kıştı a kay qezenc kena. Ma vajê kıştê şeş merdımanê cı qezenc kerdo, kışta binı panc. Ê kışta panci ê kışta şeşi ra vejenê, bı amorda jew merdımiya kışta şeşi qezenc kena. Bı no hesaba wext beno şewra ra heta şan na kay kay kenê. Çiyêdê weşê na kay esto kı, gırd u werdi heme şenê têmıyan dı na kay kaykerê u wextê xo pê hetı, têmıyan dı ravêrnê. Na zi bena semedê pê ya gırêdayenı, pê dı dayen u gırotenı...

Nuştoğ: Koyo Berz