Zazakipediya:Delame

(Delame ra ame ardış)

Delame en bol ki dardê Gozêrı, Venêrı, Şavlêrı u herwına ra vırazêno. Delame topo qıloxirıko. Ey ra namey cı sero yo, delame. Vıraştena delami wınaya darê do hendê bazidê desti qalın u hendê hirê gıştan hera cıkenê. Ê dari gênê anê kenê wışk. Wışk kerd tepey a ya bı kardana yan zi bı zewbi hacetana ey qıloxir- qıloxir roterenê u kenê top. Tabi kışta seri hebê kenê bari u serê a kıştı bı şişda germına kenê qülı.

Qülkerd tepey a Mêxo kı nalvani danê naldê Her u Estoran ro, ê mêxi ra mêxê a qülı dı kenê war. Qandê çarnayenda cı zi ladê pemeyınê qenabi ra layê do hebekê qalın vırazenê (Rêsenê). Serêdê ê lay kenê helqa u a helqa ê lay gıştêda xo ra ravêrnenê u kenê xo gışta. (Eger o kı do ê delami bıçarno çepo se keno gışta destê xo yê çepi, eger raşto se keno gışta destê xo yê raşti). Ê serê ê layê bini zi beno peydê ê mêxi ra vera cordê, vera meşkda ê delami pêşeno ê delami ro, heta serdê ê topê qalınê ê delami. O la rınd pışt ê delami ro tepey a, ê delami keno lepdê destê xo! miyan, seri ser ey erzeno erd u ê layê xo hewara anceno. (Tabi vanê erd welın, qumın u herıno sıst nêbo, çımkı o mêxê yanê serê ê delami şıno war u o delame nêçarneyêno.

Cayo kı ê delami tey bıçarnê vanê erdo sertın, salın, hirın, şıdênayın yan zi betonın bo). Wexto kı weş çekero u layê xo wextê xo dı banco o delame erdo çarneyêno u çorşmey xo geyreno. Wextê geyrayenı dı delamevani gıştanê xo kenê ey bın u ey ravêrnenê salda destê xo ser u a salda destê xo sero ey danê çarnayenı. Tay zi ey bı ê ladê destê xo ya ey erd ra hewadanê salda destê xo ser u a salı miyan dı danê çarnayenı. Tay tayê wêrê hüneri estê kı, zanayeyê delame çarnayenê, bı ladê ê delamiya zey cambaziya ê delami ê lay miyan dı danê kaykerdenı. Fınê werzanenê, fına ê laya veradanê cêr u fına ancenê salda destê xo ser. Delame çarnayenı u kaya delami zi zahf kêf, neşe u şênayey dana delamevanan, delame çarnayoxan.

Qeç u xorti bı a kayda delame çarnayena zahf wextê xo ravêrnenê. Wexto kı varan vareno u erd beno hi, delamevani axüran dı yenê pêser u delame çarnenê. Bı no hesaba wextê xo yê vengi ravêrnenê u bı a kaya kenê pırr. Tabi delame çarnayenı rê zi zanayenı lazım a. Eger kes nêzano, wextê eştenı dı nêşeno ey seri ser biyaro erd u bıdo çarnayenı. Hüner o yo kı ! wextê eştenı dı ey seri ser biyaro u bıdo çarnayenı. Jew jew fını qeçeki bı çarnayenda delamiya kewnê müsabaqadê delame çarnayenı. Heme layê xo pêşenê delamedê xo ra u hadre pawenê. Jew heta hirını amoreno. Hirê va tepey a heme fınê ra delamanê xo erzenê erd u danê çarnayenı. Ê kê hemını vêşêri bıçarneyo o qezenc keno. Yanê a çarnayenı dı ê kê bahdo bıkewo erd o beno ê jewını.

Nuştoğ: Koyo Berz


Kay Kay u Wextravêrdene

Bırı-çırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı