Zazakipediya:Qelanqizık

Qelanqizık, dara ra, maxan ra yan zi rewtandê qalınan ra vırazêno. Veri metroyê pêra derg, yanê metroyê bı nabêna dı çali aşaneyênê u hendê metroyê berz u tebera mendena dı dari yan zi dı qazıxê qalıni ê çalan miyan dı denışneyênê u kokê cı weê si yan zi çaqıl u quma yeno şıdeynayenı. Weş şıdeynenê kı, wexto kı qelanqizıkdê xo nışê, naşt-daşt, a kışt-na kışt nêlüwê u nêqılayneyê.

Metroyê yan zi dıha zi ey berzêri pê vero dı qazıxi denışnay tepeya, anê boxımêdê darı inan sero raşt mêx kenê yan zi bı çiyêna weş şıdênenê, gırêdanê u kenê mezbut. Werteyê ê boxımi kışta kı ameya ser, a kıştı ra hebê kortı kenê u bahdo zi anê çermeyê yan zi posteyê çiyê pa mêx kenê. Wırna kıştandê a kertıka taqozi danê ronıştenı, pa şıdênenê yan zi mêx kenê. Maxêda raşt u duza bêdırdeyını anê mabêndê ê wırna taqozan ra derg kenê, werte u tay cı vinenê u a kertıkı sero danê ronıştenı u çiyêna şıdênenê, kenê mezbut. Wırna serandê a maxa qandê cınıştenı hereki vırazenê. Qeçkan ra jew no sere dı, jew o sereyo bin dı, zey herana nışeno a maxı. Nışti cı u cay xo gırot tepeya, jew lınganê xo dano erd ro u xo werzaneno hewa, o bin zi xo çewtê erdi keno u yeno vera cêr. Wırna hemver pê, vera ver jew werzeno pay, jew roşeno. O kı roşeno no fın o lınganê xo dano erd ro u xo werzaneno pay u o bin vera erd yeno u roşeno. Jew beno berz, jew beno nızm. Bı no hesaba sıreyêna pê berz u nızm kenê, vera cêr, vera cor werzanenê. Wext beno dıdı zi pê peydı nışenê cı u pê werzanenê u roşanenê. Bı no hesaba qeçeki sıreyêna nışenê qelanqizıki u pa kay kenê. Qeçeki na kayda qelanqizıki ra bol hes kenê u kêfê cı zahf cı rê yeno.

Çıme

• Koyo Berz