Zazakipediya:Tazi u Arwêş

Na kay nabêndê qeçkandê werdêkan dı yena kaykerdenı. Qeçê dewê, taxê, yan zi ê mahleyê meydanê dı qandê na kay arêbenê pêser. Arêbıyay pêser tepeya bê jewi heme destanê pê tepşenê u helqa benê. O jew teberdê a helqa dı maneno. Ê kı helqa biyê u destê pê tepıştê, ê heme piya ju kıştıra destanê xo şanenê u kıştê ser pê dımı geyrenê. Wexto kı geyrenê vanê rêz u helqa xo nêxerpınê, xeta xo ya şiyayenı vıni nêkerê. O jewo kı tebera mendo, o zi ninan pey dı, gamê nabên ra ninan taqib keno u bı inan piya geyreno. Ê kı destê pê tepışto inan ra jew destê xo vıradano, kışta kı şınê a kıştı ser, ê rêzdê qeçkan u a helqa pey ra remeno. O kı teberdê helqa dı mendo vanê o zi ey dımı kewo, ey bıfetılno kı, hetan kı o cadê xo nêresto ey tepêşo. Na kaydı quralê esto kı, vanê kes riayet bıkero. O qural zi noyo. O kı destê xo vıradano u remeno, xeta kı enbazê ciyê kı helqa biya a xetı ser bıremo. O kı ey fetılneno zi vanê ey dımı a xeta ey bıfetılno. Ne o kı remeno u ne zi o kı ey fetılneno, nêşeno peydı ageyro, verniya cı bıgiro u kışta kı doş nêbenê a kıştı ser şıro, o kı remeno ey tepêşo. Ters remayenı çıniya. O kı destê xo vıradayo u remeno, o turê enbazandê xo peyre eştena, remeno kı cadê xo reso u o kı ey fetılneno nêşo ey tepêşo. Wexto kı o kı tebera ey fetılneno o nêşo o kı destê xo vıradayo u remeno ey tepêşo, o fına tebera maneno u kay ramena. No fın jewna destê xo vıradano u remeno. Wexto kı o kı destê xo vıradayo u a helqa pey ra remeno, o kı tebera ey fetılneno o ey tepêşo o veşeno. O kı veşeno o no fın tebera maneno, o kı o tepışto u veşnayo o yeno kewno herunda ey u kay domkena.

Bı no hesaba, bı pê fetılnayena, pê tepıştena yan zi nêtepıştena na kay ramena. Qeçekê werdi na kay ra bol u bol hes kenê.

Wexto kı jew ê rêz u a helqa miyan ra destanê xo vıradano u remeno, ê qeçekê biniyê rêz u helqa qirenê u vanê; "Arwêş bıremı, tazi tepêşı, arwêş bıremı, tazi tepêşı" Yanê o kı remeno beno arwêş, o kı fetılneno zi beno tazi.

O kı remeno hetan yeno reseno cadê xo, ê qeçeki heme pê fekra u jew venga vanê; "Arwêş bıremı, tazi tepêşı". Wexto kı, o kı fetılneno nêşo o kı remeno ey tepêşo u o fına cadê xo reso, no fın pu kenê o kı ey fetılneno ey u vanê; "Nan to rê heramo, tı ê warikerdenı nê ê verdê kêberiyê.

Bı no hesaba kaya xo kay kenê u wextê xo pa ravêrnenê. tabi wexto kı na kay kaykenê, jew do pil yan zi zanaye zi beno idarekerdoxê inan ê na kay. Qandê kı pêrê neheqey nêkerê, heqê pê nêwerê u pê dı lej nêkerê vanê jew inan sero bo.

Çıme bıvurne


  Kay u Wextravêrdene

Bırı-çırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı