Zazakipediya:Verg u Şıwane

Na kay zi en bol ki qeçkan u xortan miyan dı yena kaykerdenı. Qandê kaykerdenda na kay kaywani meydanê dı yan zi cayê do hera yo duz dı arêbenê pêser. Heme amey pêser tepeya qeçkan ra jew beno verg, jew beno şıwane u ê bini zi benê çarwey. Jew do pil zi kay dano idarekerdenı.

Meydano kı do tey kay kaykerê o meydan dı hendê gewêda çarwan hera, zey qıloreka (Daireya) xetê ancenê u ê kı biyê çarwey ê heme yenê a gewı miyan dı buli vındenê, yan zi roşenê. (Yanê destanê xo şanenê xo ver, zekı xo çıhar lıng kerê wıni weziyet gênê u vındenê) Ê kı kewtê a gewı miyan, vanê a xeta kı anta teberdê a xetı nêvıziyê. Ê kı bıvıziyê bı rehateya verg inan weno. Qıseyêda verênan esta, vanê; "Çarweyo kı bolda xo ra abırêno, o rew vergi rê beno werd".

O kı biyo şıwane o külavê dano xo ra, çıweyê xo keno xo dest, çorşmey a gewı şıno u ê kı gewı miyan dı rê inan vergi ver paweno. O kı biyo verg o zi destanê xo şaneno xo ver, xo keno zey vergiya u bı bulıkana (yanê dest u lıngan ser, zey herekiya) çorşmey a gewı şıno, yeno kı biyaro hesab, biyaro fırsend u a gewı ra çarwan vejo, yan zi cıra ju-dıdını teberdê xetı fino kı, bero u buro. Wexto kı çorşmey gewı şıno, yeno zey vergana zi zureno.

Şıwane paweno, verg zi yeno kı buro. Yanê şıwane u vergiya pêver danê. Wexto kı verg xo a gewı resno u jewi pero, vanê o kı perayo cı o werzo u bı rehateya vergi dımı şıro. Vanê şıwane zi bı çıwedê xo ya ê vergi bıfetılno u gewı ra duri fino. Verg çorşmey gewı geyreno, zureno u hêrışi ano çarwan ser. Şıwane zi duri ra hohohoho keno u wazeno kı vergi bıtersano u duri fino. Wexto kı verg gewı miyan dı hêrış ano bolı ser, heme fınê ra gürê pêser benê u jew cadı kom benê. Wexto kı kewno duri fına a gewı miyan ra benê vılla. Labırê teberdê gewı nêvıjênê. Bı no hesaba verg wazeno bıremno, şıwane wazeno bıpawo. Wexto kı verg xo jewi resno u ey a gewı miyan ra vejo, o dıha peydı a gewı miyan nêşıno. Yanê o veşeno u a bolda ê çarwan ra beno kemi. Zekı verg ey bero u buro, wıni yeno hesıbnayenı. Bı no hesaba bı seatana verg remeno u hêrış ano gewı ser, şıwane zi gewı paweno u ey fetılneno. Tabi na kay rê zi vazdayenı, şeytaney u çapıkey lazıma. Hım şıwane u hım zi o kı biyo verg, vanê bol şeytan u çımakerde bo. Şıwane vanê heme kıştan ra çarwanê xo bıpawo, verg zi vanê heme kıştan ra hêrış bero ser u kamcin kıştıra ard fırsend, juwerı gewı ra vejo u bero.

No hesaba na kay yena kaykerdenı. Qeçekê werdi zaf na kay ra hes kenê. o kı biyo verg wexto kı hetê ninana, hetê gewa yeno, nê qirenê, gürê pêser benê u seranê xo kenê têmiyan. Wexto kı verg hêrış ano cı ser, tay bı hüwatena, tay bı veng dayena, tay bı qirayena arêbenê pêser u nêwazenê kı, ê vergi ver kewê u ey rê êm bê.

Çıme

• Koyo Berz